"Tottenxem" uchun og'ir zarba: jamoa hujumchisi mavsum oxirigacha safdan chiqdi

Seshanba kuni «Tottenxem» Angliya chempionati doirasida «Nyukasl»ni qabul qildi. Ushbu bahsning birinchi bo'limidayoq vinger Vilson Odobert jarohat olib, maydonni tark etgan edi.

«Le Parisien» nashrining xabar berishicha, bugun ertalab Odobert tibbiy ko'rikdan o'tdi. Tekshiruvlar 21 yoshli futbolchining chap tizzasidagi oldingi xochsimon boylamlari (ACL) uzilganligini aniqladi.

Agar tashxis rasman tasdiqlansa, Odobert uchun 2025/2026 yilgi mavsum yakunlandi deb hisoblash mumkin. Odatda bunday jarohatlardan so'ng tiklanish kamida olti oy vaqt oladi. Shunga qaramay, klub tomonidan beriladigan rasmiy ma'lumotni kutish maqsadga muvofiq.

2025/2026 yilgi mavsumda Vilson Odobert 33 ta o'yinda maydonga tushib, 2 ta gol urdi va 5 ta golli uzatmani amalga oshirdi. Qayd etish joizki, Odobert Frantsiya yoshlar terma jamoasi a'zosi hisoblanadi.