Kamada mavsum oxirida "Kristal Pelas"ni tark etadi

Yaponiyalik yarim himoyachi Daiti Kamada mavsum yakunida «Kristal Pelas»ni tark etadi. Bu haqda Sky Sports nashri xabar bermoqda. 29 yoshli futbolchining shartnomasi shu yilning yozida o'z nihoyasiga etadi.

Manbaning ma'lumotiga ko'ra, klub yangi kelishuv bo'yicha muzokaralar olib bormayapti.

Futbolchi 2024 yilda murabbiy Oliver Glasnerning tashabbusi bilan «burgutlar» safiga erkin agent sifatida kelib qo'shilgan edi. Avvalroq ular Frankfurtning «Ayntraxt» klubida birgalikda Evropa Ligasida zafar quchishgan. 2025 yilda esa Kamada «Kristal Pelas» bilan Angliya Kubogi sohibiga aylandi.

Joriy mavsumda futbolchi 24 ta o'yinda maydonga tushib, 2 ta golli uzatmani amalga oshirdi va 2 ta ogohlantirish oldi. Transfermarkt portali Kamadaning bozor qiymatini 12 million evroga baholamoqda.