O'zPFL: "Metallurg" klubi katta futbolga rasman qaytdi

"Metallurg" Pro ligada ishtirok etish bo'yicha Liga tomonidan qo'yilgan minimal talablarni bajarishga erishdi.

“O‘zmetombinat” AJ tomonidan yo'llangan xatga javoban Liga "Metallurg" klubini qatnashchilar safiga qaytarish bo'yicha ishlar ketma-ketligini bayon qilgandi. Shu asosda, kombinat tomonidan joriy yilning 23 yanvar kuni Ulug'bek Mirzaev "Metallurg" klubi bosh direktori etib tayinlandi.

Liga talabiga ko'ra, klub birinchi galda FIFA Legal Portal va FIFA TMS platformalariga kirish huquqini qaytarib olishi lozim edi. Mazkur ish amalga oshirildi hamda unda aks etgan legioner futbolchi oldidagi qarzdorlik masalasiga oydinlik kiritildi. Keyinchalik, "Metallurg" qarzdorlikni bartaraf etish yuzasidan ish olib bordi va 9 fevral kuni FIFA "Metallurg" klubidan transfer ta'qiqini olib tashladi.

Endi, klubga yangi futbolchilarni ro'yxatdan o'tkazish uchun MyLeague platformasidan foydalanish huquqi taqdim etiladi. Birinchi navbatda, klub rahbar organi ro'yxatga olinadi va shundan keyin professional mehnat shartnomalari ro'yxatdan o'tkaziladi. Shuningdek, klub qoshidagi akademiya futbolchilari litsenziyalash talablari asosida Liga platformasiga kiritib chiqiladi.

"Metallurg" ta'sischisi “O‘zmetombinat” AJ klubning yillik xarajatlar smetasini tasdiqlagan bo'lib, undan Bekobod shahridagi stadionni Pro liga o'yinlariga tayyorlash xarajatlari ham joy olgan. Ayni vaqtda stadionda bu borada ishlar boshlab yuborilgan.

Yuqoridagilardan kelib chiqib, Liga "Metallurg" klubining Pro liga ishtirokchilari safiga qo'shilganligini ma'lum qiladi.