Vadim Abramov «Zenit»ga qarshi o'yin haqida o'z fikrlarini bildirdi

«Zenit» - «Dinamo» (1:0) o'rtasidagi o'rtoqlik uchrashuvidan keyin «Dinamo» bosh murabbiy Vadim Abramov klub matbuot xizmatiga intervyu berib, Rossiyaning 10 karra chempioniga qarshi bahs taassurotlari bilan o'rtoqlashdi.

«Dinamo» 1-bo'limda tengkurash namoyish etgan bo'lsa, 2-bo'limda o'yinda raqibidan ustunlik qildi, ammo vaziyatlardan foydalana olmadi.

«Zenit» bilan o'yin – yaxshi sparring bo'ldi. Yutqazganimizga faqat o'zimiz aybdormiz. O'yindagi hakamlik biroz ranjitdi. Gap kimgadir yordam berishda emas, u ikki jamoaga ham o'ynashga imkon bermadi. Yaxshiyamki, hammasi mushtlashuvgacha etib bormadi. Umuman olganda esa o'zimizning kuchli jihatlarimiz va kamchiliklarimizni bilib oldik. Birinchi bo'limdagi vaziyatlarimizdan unumli foydalanganimizda hisob boshqacha bo'lardi. Albatta, «Zenit»ning nomi ham futbolchilarga biroz ta'sir qildi.

Umuman olganda birinchi bo'limdagi o'yindan qoniqdim, ikkinchi bo'limda esa ko'plab yoshlarga imkon berdik. Xulosalar qilamiz va ishlashda davom etamiz.

Pozitsiyalar bo'yicha yigitlarga e'tirozim? Yo'q, umuman olganda hammasi joyida. Bitta o'yin hech narsani o'zgartirmaydi. O'yindan qoniqdim, kamchiliklar mana shunday kuchli raqiblarga qarshi bahsda ko'rinadi, bu biz uchun xulosa. Mana shunday o'yinlar orqali 28 fevral kungi 1-tur o'yini uchun asosiy tarkibimizni aniqlab boramiz», - dedi Vadim Karlenovich «Zenit» bilan uchrashuvdan keyin.