Karvaxal JCh-2026ga boradimi? Ispaniya terma jamoasi murabbiyi Danidan tezroq formaga qaytishni so'radi

"Real" himoyachisi Dani Karvaxal Ispaniya terma jamoasi bosh murabbiyi bilan jahon chempionatidagi ishtirokini muhokama qilmoqda.

JCh-2026 AQSh, Meksika va Kanadada 11 iyundan 19 iyulgacha bo'lib o'tadi. Avvalroq, 34 yoshli Karvaxal "Madrid"dagi o'yin vaqti kamligidan norozi ekanligi haqida xabar berilgan edi.

"As" nashrining yozishicha, Karvaxal va milliy jamoa mutaxassisi Luis de la Fuente o'rtasida tez-tez suhbatlar bo'lib o'tmoqda. Murabbiy himoyachi iloji boricha tezroq o'z formasini tiklab olishiga umid qilmoqda, biroq Karvaxalga hozircha asosiy tarkibdan joy olish nasib etmayapti.

Yil boshidan beri ispaniyalik futbolchi maydonda yarim soatdan ortiq vaqt o'tkazmadi. Joriy mavsumda Dani La Ligada jami 7 ta o'yinda ishtirok etdi.