Kroos Ronalduning boykotiga munosabat bildirdi: «Krishtianu ketsa, ligani hech kim ko'rmaydi»

Madridning «Real» klubi va Germaniya terma jamoasi sobiq futbolchisi Toni Kroos portugaliyalik Krishtianu Ronalduning Saudiya Arabistonidagi boykotiga izoh berdi. 41 yoshli Ronaldu ligadagi transfer siyosatidan noroziligi sababli «An-Nasr»ning so'nggi o'yinlarini o'tkazib yubordi.

"Saudiya chempionati — bu Ronalduning transferigacha hech kim bilmagan yangi va qiziqarli joy. Endi esa ular o'zlariga mashhurlik keltirgan insonga nisbatan hurmatsizlik ko'rsatishmoqda. Ishonchim komilki, agar Krishtianu ushbu ligani tark etsa, odamlar uni tomosha qilishni to'xtatishadi", — dedi Kroos o'z podkastida.

Ronaldu 2023 yilning qishida «An-Nasr»ga o'tgan edi. Hujumchining saudiyaliklar bilan tuzgan mehnat shartnomasi 2027 yilning iyun oyi yakunida tugaydi. Uning bozor qiymati 12 million evroni tashkil etadi.