O'rtoqlik o'yini. «Paxtakor» Moldova klubi ustidan g'alabaga erishdi

Antaliyada yig'in o'tkazayotgan «Paxtakor» jamoasi 8 fevral kuni ikkinchi nazorat uchrashuvini Moldovaning «Petrokub» klubiga qarshi o'tkazdi. Uchrashuv juda shiddatli va voqealarga boy tarzda kechdi.

Bellashuvning 7-daqiqasida hisob ochildi. Ibrohim Ibrohimovning aniq uzatmasidan keyin Hojimat Erkinov jarima maydoni ichida to'pni nazoratga olib, chiroyli zarba bilan darvozani ishg'ol qildi. 27-daqiqada esa Turg'unboevning pasidan keyin Ibrohimovning o'zi gol muallifiga aylanib, jamoamizning ustunligini oshirdi.

Birinchi bo'lim davomida «Petrokub» ham faol harakat qildi va 33-daqiqada hisobni qisqartirishga muvaffaq bo'ldi. Shu hisobda tomonlar tanaffusga yo'l olishdi.

Ikkinchi bo'lim boshida tarkib o'zgarishsiz qoldi. 59-daqiqada murabbiylar shtabi katta rotatsiya qildi: maydonga bir qator yangi futbolchilar tushirildi va faqat Dilshod Saitov o'yinni davom ettirdi. 69-daqiqada raqib yana bir bor darvozaga yo'l topib, hisobni tenglashtirdi.

Shundan so'ng «Paxtakor» yana tashabbusni qo'lga oldi. 75-daqiqada tayinlangan penaltini Rustam Turdimurodov aniq amalga oshirib, jamoani yana oldinga olib chiqdi. 80-daqiqada esa yana bir yosh debyutant — 2008 yilda tug'ilgan Amirxon Murotov markaziy himoyachi sifatida maydonga tushdi.

Qolgan daqiqalarda «Paxtakor» ustunlikni saqlab qoldi va nazorat uchrashuvi jamoamizning g'alabasi bilan yakunlandi. Bu bellashuv yig'in davomida tarkib va o'yin variantlarini sinab ko'rish uchun muhim tajriba vazifasini o'tadi.

8 fevral, 2026 yil. Antaliya.
"Paxtakor" - "Petrokub" 3:2
Gol: Hojimat Erkinov (7), Ibrohim Ibrohimov (27), Rustam Turdimurodov (75).

Manba: pakhtakor.uz