«Hech bir o'yinga 100 foiz tayyor holda chiqmadim»: «Chelsi» yulduzi qiyin mavsumni o'tkazmoqda

«Chelsi» yarim himoyachisi Koul Palmer faoliyati davomida ilgari hech qachon bunday jarohatlar bilan bog'liq muammolarga duch kelmaganini ma'lum qildi.

Shanba kuni 23 yoshli futbolchi Premer-liga doirasida «Vulverxempton»ga qarshi kechgan o'yinda (3:1) xet-trik qayd etdi. Ingliz futbolchisi har uchtala golni ham birinchi bo'limning o'zidayoq kiritdi, ulardan ikkitasini penaltidan amalga oshirdi.

«Ushbu mavsumgacha faoliyatim davomida jarohatlar bilan bog'liq muammolar bo'lmagan edi. Men uchun bu yangilik va men hali ham bunday vaziyatlar bilan qanday kurashishni o'rganyapman. Albatta, bu kishini xafa qiladi. O'ylashimcha, bu mavsumda birorta ham o'yinga 100 foiz tayyor holatda etib kelmadim. Maydonga tushar ekanman: «Buni qila olamanmi, uni-chi?» deb o'ylayman. Bu haqda haddan tashqari ko'p bosh qotiryapman», – deya Palmerning so'zlaridan iqtibos keltirmoqda «Chelsi» matbuot xizmati.