Viktor Dyokeresh "to'xtamayapti": Shvetsiyalik hujumchi "Arsenal" safida so'nggi 4 o'yinda 4 ta gol urdi

Londonning "Arsenal" klubi APL 25-turi doirasida hujumchi Viktor Dyokereshning ikkita goli evaziga "Sanderlend"ni mag'lub etdi (3:0). Shu tariqa, "to'pchilar"ning shvetsiyalik forvardi so'nggi to'rtta uchrashuvda to'rtta gol urishga muvaffaq bo'ldi.

Bundan avval Dyokeresh Angliya chempionati doirasidagi "Lids Yunayted" (4:0) va Chempionlar Ligasi 8-turidan o'rin olgan "Qayrat" (3:2) bilan bahslarda ham o'z nomini tabloga yozdirib qo'ygan edi.

Joriy mavsumda skandinaviyalik hujumchi barcha musobaqalarda 32 ta o'yinda maydonga tushib, o'z hisobiga 13 ta gol va 3 ta assist yozdirib qo'ydi.

2025 yil 26 iyul kuni Viktor Dyokeresh "Sporting"dan "Arsenal"ga o'tib, shartnoma imzolagan edi. Transfermarkt portali ma'lumotlariga ko'ra, futbolchining bozor qiymati 70 million evroni tashkil qiladi.