Futzal bo'yicha O'zbekiston milliy terma jamoasi murabbiylar shtabi to'liq tarkibi bilan iste'foga chiqarildi

Bugun O'zbekiston futzal federatsiyasi Ijroiya qo'mitasining navbatdan tashqari yig'ilishi bo'lib o'tdi. Unda O'zbekiston milliy futzal terma jamoasining Osiyo kubogi–2026 musobaqasidagi ishtiroki tanqidiy ruhda muhokama qilindi.

Yig'ilishda O'zbekiston futzal federatsiyasi prezidenti Bekzod Mamatqulov terma jamoaning qit'a birinchiligidagi ishtirokini baholar ekan, musobaqaga puxta tayyorgarlik ko'rish uchun barcha zarur shart-sharoitlar yaratilganini ta'kidladi. Xususan, murabbiylar shtabi ish rejasi asosida muntazam o'quv-mashg'ulot yig'inlari tashkil etilgani, jamoaga jahonning kuchli TOP terma jamoalari sparring raqib sifatida jalb etilgani qayd etildi.

Shu bilan birga, Indoneziyada bo'lib o'tgan musobaqa davomida jamoa a'zolari o'z imkoniyatlari darajasidan past ishtirok etgani, futzalchilarda kurashga chanqoqlik va g'alabaga bo'lgan ishtiyoq kabi muhim jihatlar etarlicha namoyon bo'lmagani tanqid qilindi. Natijada terma jamoa guruh bosqichidan qiyinchilik bilan pley-offga chiqqan bo'lsa-da, chorak finalda oldiga qo'yilgan vazifani bajara olmadi.

Milliy terma jamoa bosh murabbiyi Nodir Eliboevning boshqa ishga o'tganligi munosabati bilan iste'fo to'g'risidagi arizasi inobatga olindi. Shuningdek, O'zbekiston milliy futzal terma jamoasi murabbiylar shtabi to'liq tarkibi bilan iste'foga chiqarilishi haqida qaror qabul qilindi.

O'zbekiston futzal federatsiyasi Ijroiya qo'mitasi milliy terma jamoa murabbiylar shtabiga o'tgan davr mobaynidagi faoliyati uchun minnatdorlik bildirib, kelgusidagi faoliyatida ularga omad tiladi.

O'zbekiston milliy futzal terma jamoasining yangi murabbiylar shtabi yaqin kunlarda keng jamoatchilik va muxlislar e'tiboriga havola etiladi.