Angliya terma jamoasi JCh-2026 oldidan o'rtoqlik o'yini uchun raqib tanladi

Angliya terma jamoasi Jahon chempionatidagi ilk o'yinini 17 iyun kuni o'tkazadi. Ungacha Tomas Tuxel jamoasi AQShda ikkita o'rtoqlik uchrashuvini o'z ichiga olgan tayyorgarlik yig'inini o'tkazishni rejalashtirmoqda.

The Sun nashrining xabar berishicha, Angliya terma jamoasi 6 iyun kuni Yangi Zelandiyaga qarshi o'rtoqlik uchrashuvida maydonga tushadi. Ushbu jamoa ham mundial ishtirokchisi hisoblanadi.

Ikkinchi nazorat o'yini 10 iyun kuniga belgilangan, biroq raqib nomi hozircha noma'lum.

Ta'kidlash joizki, mart oyida Angliyani o'z uyida Urugvay va Yaponiyaga qarshi qiziqarli bahslar kutmoqda. O'yinlar mos ravishda 27 va 31 mart kunlari bo'lib o'tadi.

Jahon chempionatining guruh bosqichida Angliya Xorvatiya, Gana va Panama terma jamoalariga qarshi kurash olib boradi.