«Real» yulduzi EChLda 2 o'yinga diskvalifikatsiya qilindi

«Real» fevral oyining ikkinchi yarmida Chempionlar ligasining 1/8 final yo'llanmasi uchun «Benfika» bilan kuch sinashadi. Har ikkala uchrashuvda madridliklar hujumchi Rodrigosiz maydonga tushishadi.

The Athletic nashri xabariga ko'ra, Rodrigo UEFA tomonidan ikkita o'yinga diskvalifikatsiya qilindi. Braziliyalik futbolchi bunday jazoga umumiy bosqich doirasida «Benfika»ga qarshi kechgan o'tgan o'yindagi haqoratli so'zlari uchun loyiq ko'rildi. O'shanda Rodrigo bahs yakunida maydondan chetlatilgan edi.

Eslatib o'tamiz, Rodrigo o'sha qizil kartochka uchun «Real» muxlislaridan uzr so'ragan edi. «Qaymoqranglilar» Lissabonda 2:4 hisobida mag'lub bo'lishgandi. Qur'a natijasiga ko'ra, «Real» va «Benfika» o'tish bosqichida yana to'qnash keladigan bo'lishdi.