Karrager: "Slot o'ziga xos uslubga ega murabbiy sifatida esda qolishni istaydi"

"Liverpul"ning sobiq futbolchisi Jeymi Karragerning fikricha, Arne Slotning futbol uslubi va sovrinlar haqidagi so'zlari noto'g'ri talqin qilingan.

Avvalroq mersisaydliklar bosh murabbiyi "APL, EChLda g'alaba qozonishing mumkin, ammo uzoq muddatli istiqbolda chiroyli futbol ko'rsatish ancha qimmatga tushadi," degandi.

"Murabbiy sifatida u o'zini o'yin uslubi bilan eslab qolishlarini xohlaydi. Bu u kimni boshqarmasin, butun faoliyati davomida o'ynaydigan futbol.

Ha, u "Liverpul"ni tark etgach, sovrinlar muhimroq bo'ladi. Biz hammamiz buni tushunamiz va menimcha, Arne Slot ham buni biladi. Ammo menimcha, u bizga o'z uslubiga ega murabbiy sifatida esda qolishni istayotganini, u har doim o'zi to'g'ri deb bilgan tarzda o'ynashga intilayotganini aytmoqchi. Bu to'g'rimi? Bu har doim bahs-munozaralarga sabab bo'ladi", - dedi Karrager Sky Sports efirida.