Kivu Kubokdagi muvaffaqiyat haqida gapirdi

Milanning «Inter» klubi ustozi Kristian Kivu jamoasining «Torino»ga qarshi o'tkazilgan so'nggi o'yini natijasi haqida o'z fikrlarini bildirdi.

Italiya Kubogi chorak finali doirasidagi ushbu uchrashuv «neradzurri»ning 2:1 hisobidagi g'alabasi bilan yakunlandi.

«Men o'yindan, bunday bahsda biz uchun juda zarur bo'lgan energiyadan va yarata olgan vaziyatlarimizdan mamnunman. Albatta, hisob 2:1 ko'rinishiga kelganda, raqibda «ikkinchi nafas» ochiladi va ular ushbu impulsni ilib ketishga harakat qilishadi, biroq ular bizga jiddiy muammo tug'dirishmadi», — deya Kivuning so'zlarini keltiradi Sport Mediaset.

Italiya chempionatining 23 turidan so'ng milanliklar 55 ochko jamg'argan holda turnir jadvalida birinchi o'rinni egallab turishibdi.

Yakshanba kuni «Inter» safarda «Sassuolo»ga qarshi maydonga tushadi.