Fabritsio Romano «Real» qishda rad qilgan transfer haqida ma'lumot berdi

«Al-Hilol» yarim himoyachisi Ruben Nevesh qishki transfer oynasida Madridning «Real» klubiga o'tishi mumkin edi.

Mashhur insayder Fabritsio Romanoning tasdiqlashicha, o'tgan oyda 28 yoshli futbolchining xizmatlari chindan ham «qirollik klubi»ga taklif qilingan. Biroq «qaymoqranglilar» qishda hech kim bilan shartnoma imzolashni istamaganlari sababli Portugaliya terma jamoasi xavbekidan voz kechishga qaror qilishgan. Chorshanba kuni futbolchi Saudiya klubi bilan amaldagi shartnomasini 2029 yilning o'rtalariga qadar uzaytirdi.

«Al-Hilol»ga o'tgunga qadar Ruben Nevesh olti yil davomida Angliyaning «Vulverxempton» jamoasida to'p surgan, undan oldin esa «Portu» sharafini himoya qilgan. Portugaliyalik futbolchining narxi Transfermarkt portali tomonidan 25 million evroga baholanmoqda.