Ketma-ket 4 o'yinda gol urgan Yamal o'z samaradorligi haqida gapirdi

«Barselona» vingeri Lamin Yamal o'z samaradorligi haqida fikr bildirdi.

18 yoshli ispaniyalik futbolchi yaqinda shaxsiy rekordini o'rnatdi — u faoliyatida ilk bor «ko'k-anorranglilar» safida ketma-ket to'rtta o'yinda gol urishga muvaffaq bo'ldi. Shunga qaramay, futbolchining ta'kidlashicha, bu u uchun asosiy narsa emas.

«Mening o'yin uslubim faqat urilgan gollarga bog'lanib qolmagan. Bu erda vaziyat turlicha: men yaxshi o'ynashim mumkin, lekin gol urmasam, odamlar norozi bo'lishadi. Yoki gol urib, yomon o'yin ko'rsatishim mumkin, bu ham norozilik uyg'otadi. Mening asosiy maqsadim — jamoa g'alabasi uchun hamma narsani qilish», — deya Yamalning so'zlarini keltirmoqda Barca Universal.

Kataloniya grandi yulduzi joriy mavsumda barcha turnirlarda 29 ta uchrashuvda maydonga tushib, o'z hisobiga 14 ta gol va 13 ta golli uzatmani yozdirib qo'ydi.