«Real»dan super yurish: 65 millionlik futbolchi 9 millionga qaytarib olinyapti

«Komo» yarim himoyachisi Nikolas Pas mavsum yakunlanganidan keyin Madridning «Real» klubiga qaytadi.

21 yoshli futbolchi Sesk Fabregas jamoasida o'z iqtidorini to'la namoyish etdi va «qaymoqranglilar» rahbariyatining fikricha, u uyga qaytishga tayyor. Diario AS nashrining xabariga ko'ra, «Real» kelayotgan yozda argentinalik futbolchini 9 million evro evaziga qayta sotib olish huquqidan foydalanadi. Bu mablag' futbolchining bozor qiymatidan ancha past hisoblanadi — boshqa klublar «Komo» yulduzini qo'lga kiritish uchun bundan bir necha barobar ko'p haq to'lashlariga to'g'ri keladi.

Hozircha «Real» Nikolas Pasni asosiy tarkibda o'ynatishni rejalashtiryaptimi yoki yo'q — bunisi noma'lum. Hujumkor yarim himoyachi boshqa biror grand klubga foydaliroq narxda qayta sotib yuborilishi ham istisno etilmayapti. Transfermarkt portalida futbolchining narxi ayni damda 65 million evro etib belgilangan.