Fanat Qahramonov: «Kelasi janglarda yanada yaxshi harakat qilaman»

Iordaniyaning Amman shahrida Osiyo/Okeaniya bokschilari uchun litsenzion musobaqa boshlandi. Kecha -75 kg vaznli bokschimiz Fanat Qahramonov musobaqa doirasida mezbon sportchini mag'lubiyatga uchratdi. Biz uning dastlabki jangidan so'ng fikrlari bilan qiziqdik.

"Oz vaqt qolganida musobaqada qatnashishim aniq bo'ldi. Shu sababli dastlabki jangim biroz qiyin bo'ldi. To'g'risini aytaman, vazn qaytarib charchadim. Uch kun ichida olti kilogramm vazn tashlashga to'g'ri keldi. Nasib bo'lsa, kelasi janglarda yanada yaxshiroq o'yin ko'rsataman va o'zimga bildirilgan ishonchni oqlayman", — dedi Qahramonov.

Endi Fanat musobaqaning nimchorak finalida uchinchi raqam ostida saralangan bokschi, samoalik Yansen Puotaga qarshi ringga ko'tariladi.

O'zbekiston boks federatsiyasi matbuot xizmati