«Ular Osiyodagi «Real»ga o'xshaydi». Benzema «Al-Hilol»ga o'tgandan keyin fikr bildirdi

Hujumchi Karim Benzema «Al-Ittihod»dan «Al-Hilol»ga o'tgandan so'ng o'z fikrlari bilan o'rtoqlashib, yangi jamoasini Madridning «Real»i bilan qiyosladi.

«Bu boy tarixga ega, ko'plab sovrinlarni qo'lga kiritgan yaxshi jamoa. Ular Osiyodagi “Real Madrid”ga o'xshaydi. Hammasi joyida, muxlislar ajoyib, jamoa juda yaxshi o'ynaydi, tarkibda to'g'ri ruhiyatga ega sifatli futbolchilar bor.

Bu jamoa menga avval ham yoqardi. “Real Madrid” safida o'ynagan paytimda ularga qarshi maydonga tushganman va o'sha o'yin oson kechmagan. Bu yaxshi uchrashuv edi va menda yoqimli xotiralar qolgan. Bugun esa baxtiyorman, chunki “Al-Hilol” safida o'ynayapman», — deya Benzemaning so'zlarini keltiradi uning yangi klubi rasmiy sayti.

Benzema 2023 yil yozidan beri Saudiya Arabistoni chempionatida to'p surib kelmoqda, u Madridning «Real» klubidan «Al-Ittihod»ga o'tgan edi. Ispaniya klubi safida frantsiyalik futbolchi Chempionlar ligasini besh marta qo'lga kiritgan, shuningdek, «Oltin to'p» sohibi bo'lgan. Joriy mavsumda u barcha musobaqalarda klub uchun o'tkazilgan 21 ta uchrashuvda 16 ta gol muallifi bo'lgan.