«Andijon» va «Antaliyaspor» o'rtasida hamkorlikning yangi bosqichi
/ Kiritdi: BestMaster Ko'rilgan: 489
Antaliya shahrida «Andijon» futbol klubi rahbariyati hamda fan-klubimiz raisi «Antaliyaspor» klubi rahbariyati va ularning fan-klub raisi bilan uchrashuv o'tkazdi. Ushbu muloqot 2023-yilda o'tkazilgan ilk uchrashuvning mantiqiy davomi sifatida baholanmoqda.
Uchrashuv oldidan mehmonlar an'anaviy andijoncha osh bilan mehmon qilindi. Bu nafaqat milliy taomlarimizni namoyon etish, balki ikki tomon o'rtasida iliq, do'stona muhit yaratishga xizmat qildi.
Ma'lumki, yaqinda O'zbekiston Respublikasi Prezidenti Turkiya Respublikasi Prezidenti bilan uchrashib, ikki davlat o'rtasidagi do'stona aloqalarni yanada mustahkamlash bo'yicha muhim kelishuvlarga erishildi. Shuningdek, Andijon viloyati hokimining Istanbulga amalga oshirgan rasmiy tashrifi ham ikki tomonlama hamkorlikni yangi bosqichga olib chiqdi.
Ana shu umumdavlat darajasidagi munosabatlar zamirida sport sohasida ham samarali hamkorlikni yo'lga qo'yish maqsadida «Andijon» klubi bilan «Antaliyaspor» o'rtasidagi muzokaralar o'tkazildi.
Uchrashuv davomida tomonlar yoshlar futboli va akademiyalar o'rtasida hamkorlikni rivojlantirish, murabbiylar va mutaxassislar o'rtasida tajriba almashish, iqtidorli futbolchilarni qo'llab-quvvatlash hamda qo'shma loyihalarni amalga oshirish masalalarini muhokama qilishdi.
Ayniqsa, bolalar-o'smirlar futbolida zamonaviy tayyorgarlik tizimini joriy etish, skauting va selektsiya yo'nalishlarida hamkorlik qilish, mashg'ulot jarayonlarida ilg'or tajribalardan foydalanish borasida aniq takliflar ilgari surildi.
Uchrashuv yakunida «Antaliyaspor» rahbariyati va fan-klubi raisi Andijon shahriga rasmiy tashrif buyurishga taklif etildi. Bu tashrif doirasida «Andijon» infratuzilmasi, akademiya faoliyati, mashg'ulot bazalari bilan yaqindan tanishish hamda kelgusidagi hamkorlik qadamlarini belgilab olish rejalashtirilmoqda.
Bu muloqot «Andijon» klubi uchun xalqaro hamkorlikni kengaytirish, yoshlar tayyorgarligini yangi bosqichga olib chiqish hamda klub nufuzini oshirish yo'lidagi muhim qadamlardan biri bo'ldi. Tashrif yakunida esa esdalik sovg'alar ulashildi.
Ishonch bilan aytish mumkin, «Andijon» va «Antaliyaspor» o'rtasida yo'lga qo'yilayotgan hamkorlik nafaqat ikki klub, balki ikki mamlakat sport munosabatlarini yanada mustahkamlashga xizmat qiladi.
Bosh sahifaga
321