Germaniya hukumati 2026 yilgi Jahon chempionatiga boykot e'lon qilmaydi

Germaniya Federativ Respublikasining sport va volontyorlik masalalari bo'yicha davlat vaziri Kristiane Shenderlyayn Germaniya hukumati Jahon chempionatini boykot qilish imkoniyatini ko'rib chiqmayotganini ma'lum qildi.

"Biz boykot masalasini ko'rib chiqmayapmiz. Hukumatda buni muhokama qildik va shuni aytamizki: biz buni qo'llab-quvvatlamaymiz. AQSh bilan munosabatlar tashqi siyosat asosida shakllanadi, bu boshqa daraja.

Sportdan bu maqsadda foydalanish kerak emas. Birinchi o'rinda musobaqa turishi lozim. Bundan tashqari, bo'lajak Jahon chempionati nafaqat AQShda, balki Kanada va Meksikada ham bo'lib o'tadi.

Qaror qabul qilish DFB (Germaniya futbol ittifoqi) va FIFA qo'lida, chunki biz sport avtonomiyasini hurmat qilamiz. Yakuniy qarorni siyosat emas, balki sportning o'zi qabul qilishi kerak", — dedi Shenderlyayn "Süddeutsche Zeitung" nashriga bergan intervyusida.