Joan Laporta: "Yangilangan «Kamp Nou» Evropadagi eng yaxshi stadion bo'ladi"

"Barselona" prezidenti Joan Laporta rekonstruktsiya qilinayotgan "Kamp Nou" stadionining kelajagi haqida katta ishonch bilan gapirdi. Stadionni qayta qurish ishlari 2023 yilda boshlangan bo'lib, hali to'liq yakunlanmagan bo'lsa-da, o'tgan yilning noyabr oyidan buyon unda o'yinlar o'tkazilmoqda.

"Biz cheksiz faxr tuyg'usini his qilyapmiz. Bu Evropadagi eng yaxshi stadion bo'ladi. Eng yirigi — qariyb 105 ming o'rindiqli, qulay, xavfsiz va tijoriy jihatdan jozibador maskanga aylanadi.

Biz unda yirik finallar o'tkazilishini istaymiz. 2029 yilgi Chempionlar ligasi finali qurib bitkazilgan va haqiqiy sovg'aga aylangan "Kamp Nou"da o'tishini juda xohlardik. Shuningdek, 2030 yilgi Jahon chempionati finalini aynan shu erda o'tkazish ajoyib bo'lardi. O'z uyimizga to'liq qaytganimizda, bu dunyodagi eng yaxshi stadion bo'ladi", — dedi Laporta.