Muxlislarni stadionlarga jalb etish va muxlislik madaniyatini oshirish bo'yicha ish olib boriladi

O'zPFL muxlislarni stadionlarga jalb qilish, muxlislik madaniyati, shuningdek, futbol uchrashuvlari paytida o'zini tutish qoidalarini tushuntirish bo'yicha ish olib boradi.

Ayni kunlarda ushbu masalalarni amalga tatbiq etish bo'yicha ish boshlagan mutaxassislar dastlab, Jizzax viloyatiga tashrif buyurishdi va mahalliy futbol mutasaddilari, futbol muxlislari bilan uchrashuvda ishtirok etishdi. Ushbu yig'ilishda shuningdek, viloyat IIB ommaviy tadbirlar davomida tartibni saqlash bo'yicha rasmiylar ham ishtirok etdi va muxlislarga stadionlarda o'zini tutish qoidalari bo'yicha tushuntirish berildi.

Ushbu yig'ilishda asosiy masalalardan biri sifatida O'zbekiston Respublikasi Prezidentining 2019 yil 4 dekabrdagi “O'zbekistonda futbolni rivojlantirishni mutlaqo yangi bosqichga olib chiqish chora-tadbirlari to'g'risida”gi PF-5887-sonli Farmoni ijrosini ta'minlash yuzasidan amalga oshirilayotgan loyihalar va belgilangan vazifalar jamoatchilikka tanishtirildi. Jumladan, stadionlarga futbol muxlislarini yanada ko'proq jalb etish, muxlislarga qulaylik yaratish, Muxlis kodeksi qoidalar majmuini ishlab chiqish kabi masalalar bo'yicha fikr almashildi.

Bunday uchrashuvlar hududlarda doimiy tarzda tashkil qilinishi ko'zda tutilgan.