«Barselona» — Ispaniya Kubogining haqiqiy qiroli: 20 yil ichida 16-yarim final!

«Barselona» — Ispaniya Kubogining haqiqiy mutaxassisi. Kataloniya klubi so'nggi yigirma yil ichida 16-marta musobaqaning yarim finaliga yo'l oldi. Bu natija «Albasete» ustidan qozonilgan kamtarona 2:1 hisobidagi g'alabadan so'ng qayd etildi.

Avvalroq «Albasete» turnirdan Madridning «Real» klubini chiqarib yuborgan edi, biroq kataloniyaliklarga qarshilik qila olmadi. Umumiy hisobda esa «Barselona» Ispaniya Kubogi (Qirol Kubogi) yarim finalida jami 62 marta ishtirok etgan. Klub 43 marta finalgacha etib borgan va ularning 32 tasida g'alaba qozonib, kubokni qo'lga kiritgan. Bu Ispaniyadagi eng yaxshi natija hisoblanadi — taqqoslash uchun, «Real» ushbu kubokda atigi 20 marta zafar quchgan.