"Andijon"ning "Shaxtyor"ga qarshi nazorat o'yini oxirigacha etmay qoldi

Kecha “Andijon” navbatdagi o'rtoqlik uchrashuvi doirasida Qozog'istonning “Shaxtyor” klubiga qarshi maydonga tushdi. Lekin mazkur bahs yakuniga etmasdan, aniqrog'i 54-daqiqada to'xtatildi.

O'yinni litvalik hakamlar brigadasi boshqardi. Afsuski, ushbu referilar bahs boshidanoq o'yin tizginini qo'ldan chiqarib yuborishdi. Raqib tomonidan qilingan qo'polliklarga hakam hech qanday reaktsiya bildirmagani natijasida qo'polliklar yana davom etaverdi. Buning oqibatida Imeda Ashortia, Dragan Cheran, Abdurahmon Komilov majburiy o'zgarishlarga sabab bo'ldi. 54-daqiqada esa Abdulvohid G'ulomovga ham yaqqol va jiddiy qo'pollik ishlatildi va shundan keyin hakam o'yinni to'xtatdi va avvalo o'zlari maydondan chiqib ketishdi.

Saviya jihatidan juda salbiy taassurot qoldirgan hakamlarning qo'polliklar yaqqol qip-qizil kartochkaga loyiq bo'lsa-da, jim turgani albatta jiddiy e'tirozlarga sabab bo'ldi. Shunda ham andijonliklar o'yinni davom ettirdi. Biroq ikkinchi bo'limda raqibning yana bir keskin qo'polligini hakam qizil kartochka bilan jazolash o'rniga uchrashuvni to'xtatishga qaror qildi.

Bahs davomida ikki marta tez yordam mashinasi ishga tushdi va "Andijon" futbolchilarini shifoxonaga olib borishiga to'g'ri keldi. Shunday ekan, raqibning xaddan ortiq qo'pol munosabatda bo'lishi hamda hakamning saviyasizligi fonida bunday uchrashuvning to'xtatilgani qaytanga yaxshi bo'ldi.

“Shaxtyor” (Qozog'iston) - “Andijon” - 0:0...

2 fevral. Antaliya. “Susesi sport markazi” stadioni.

Hakamlar: Orestas Abramavichus, Eymantas Rudavichus, Simas Kaushas (barchasi - Litvadan).

“Shaxtyor”: Igor Shatskix, Mark Bogachov, Shaxsultan Zubaydilda, Timur Rudaselski, Xasen Artur Uulu, Vladislav Prokopenko, Arup Sautov, Alen Aymanov, Aslan Ahmedov, Dias Kalibaev, Rafael Ospanov.

“Andijon”: Rahimjon Davronov, Nemanya Chalasan, Islom To'xtaxo'jaev, Odil Abdumajidov, Abdurahmon Komilov, Aleksandr Andronikashvili, Jamshid Boltaboev, Dragan Cheran, Doniyor Abdumannopov, Imeda Ashortia, Martin Boake.

Zaxiradan maydonga tushganlar: Usmonali Ismonaliev, Xumoyunmirzo Iminov, Abdulvohid G'ulomov, Bekzod Sulaymonov, Kristian Novak, Muhammadkarim Toirov, Damir Temirov, Po'latxo'ja Xoldorxonov.