Grinvud angliyalik futbolchilar orasida sermahsullik bo'yicha faqat Keyndan ortda qolmoqda

"Marsel"ning angliyalik vingeri Meyson Grinvud joriy mavsum barcha musobaqalarda 21 ta gol va 7 ta assistni o'z hisobiga yozdirib qo'ydi. Bu ko'rsatkichlar Liga 1ning barcha o'yinchilari orasida eng yaxshisi. U "Bavariya" forvardi Xarri Keyndan boshqa har qanday angliyalik futbolchining natijalarini ortda qoldirmoqda. Bu haqda The Touchline X ijtimoiy tarmog'ida xabar berdi.

Xarri Keyn joriy mavsumda barcha musobaqalarda 32 ta o'yinda 36 ta gol va 4 ta assistga mualliflik qilgan.

2024 yilning 18 iyulida Grinvud "MYu"dan "Marsel"ga o'tgan va besh yillik shartnoma imzolagandi. Avvalroq, vingerga Kataloniyaning "Barselona" klubi qiziqish bildirayotgani haqida xabarlar tarqalgan edi.