Davron Fayziev «Chelsi» muvaffaqiyati, «Liverpul» inqirozi haqida fikr bildirdi

«Chelsi»ning yutuqlari hozircha lokal, keyingi mavsum globalga aylanishi mumkin. Bu mening biroz ehtiyotkorlik bilan qilayotgan taxminim.

Pastki divizion poygalarida o'zini ko'rsatib Formula-1 jamoasiga taklif oladigan har qanday iste'dodli pilot ham dastlab o'z bolidini ko'p marta urib oladi. Jamoa uchun urilgan bolidlar bu sarf-xarajat bo'lishiga qaramay poygachiga imkon beriladi va u yakunda liderga aylanadi.

Lempardga ham imkon berish kerak. U hali top-murabbiy emasdir. Orada yutqazib turibdi. Lekin «Chelsi»ning bugungi kundagi o'yinini ko'rish zavq bag'ishlaydi. Mana, kichik lokal natijalar ham qayd etilyapti. «Chelsi» «Liverpul»ni kubokdan chiqarib yubordi. Frenki ham topga aylanadi, biroz o'tgach.

«Liverpul» etib keldimi? Yo'g'-e. Darrov shu xayolga bordingizmi. Har qanday klubda mavsum davomida ma'lum muddat inqiroz bo'ladi («Arsenal»ning rekordi endi bu 100 yilda bir bo'ladigan voqea). «Liverpul» mana hozir shu inqirozni boshdan o'tkazyapti. Qancha davom etishi eng asosiy masala. Lekin, menimcha kechagisi oxirgisi edi. Rekord tempida yugurib ketayotgan atlet sal muvozanatni yo'qotsa yana tezlikni tiklaguncha 3-4 qadam sarflaydi. «Atletiko» o'rnida xushyor bo'laverardim.

Darvoqe, kecha zo'r o'yin bo'ldi. Lempard - Klopp yangi qarama-qarshilik. Ular o'rtasida printsipiallik yo'q. Shunchaki chiroyli futbol.

Davron Fayziev.