Tata Steel Chess–2026. Nodirbek Abdusattorov bugun g'alaba qozonib, so'nggi tur oldidan yaqqol peshqadamga aylandi

Niderlandiyaning Veyk-an-Zee shahrida shaxmat bo'yicha 2026-yilgi Tata Steel Chess turniri ertaga yakuniga etadi. Bugun shaxmatchilar 12-tur bahslarini o'tkazishdi.

Chempionatning Masters guruhida ishtirok etayotgan Javohir Sindorov kecha Arjun Erigaisi (Hindiston) ustidan muhim g'alabaga erishib, peshqadamga aylangandi. Hamyurtimiz 12-turda hindistonlik Rameshbabu Praggnanandhaga qarshi o'yinda tezkor durang qayd etdi: 14-yurishga kelib tomonlar bir yurishni 3 marta takrorlashdi.

Nodirbek Abdusattorov esa bugun germaniyalik Matteus Blyubaumga qarshi bahsda muhim g'alabani qo'lga kiritdi. Partiyaning 30-yurishigacha kompyuter vaziyatni teng deya baholayotgan bo'lsa-da, vatandoshimiz raqibga bosim o'tkazayotgan edi. Natijada raqib 31-yurishda qo'pol xatoga yo'l qo'ydi. Nodirbek Matteusning xatosidan o'ta unumli foydalanib, katta ustunlikni qo'lga kiritdi. Abdusattorov bitta sipoh ustunligini qo'lga kiritgach, Blyubaum taslim bo'ldi.

Nodirbek Abdusatttorov bugungi g'alaba evaziga o'z ochkolarini 8 taga etkazib, yaqqol peshqadamga aylandi. Sindarov hisobida esa 7,5 ochko mavjud. Ikki shaxmatchi hisobida 7 tadan ochko bor.

Abdusattorov ertaga 13-tur doirasida Arjun Erigaisiga qarshi qora donalarda o'ynaydi. Javohir Sindarov esa turnir autsayderi Nguen Tay Day Van (Chexiya)ga qarshi qora donalarda bahs yuritadi.