«Inter» Niko Pasni xarid qilish umidini yo'qotmayapti

«Inter» «Komo» jamoasining hujumkor yarim himoyachisi Nikolas Pasga qiziqish bildirmoqda.

Ko'plab mish-mishlarga ko'ra, 21 yoshli futbolchi joriy mavsum yakunida Madridning «Real» klubiga qaytishi kerak. Ammo Topskills Sports UK xabar berishicha, argentinalikka yana bir da'vogar bor — bu «Inter». «Neradzurrilar» skautlari «Komo» etakchisining o'yinlarini yaqindan kuzatmoqda va uni tarkibga qo'shib olish umidini saqlab qolgan. Biroq milanliklar uchun asosiy muammo — futbolchining narxi: u taxminan 100 million evro deb baholanmoqda.

Eslatib o'tamiz, birinchi navbatda sotib olish huquqi tufayli «Real» o'z tarbiyalanuvchisini bozor qiymatidan ancha arzon — atigi 9 million evro evaziga qaytarib olishi mumkin. Transfermarkt portali Nikolas Pasning qiymatini 65 million evro deb baholaydi.