Samvel Babayan: «Ishonch bilan ayta olaman, 2026-yilgi mavsum eng qiziqarlisi bo'ladi»

"Andijon" bosh murabbiyi Samvel Babayan "Kaspiy" klubiga qarshi bo'lib o'tgan o'rtoqlik o'yinidan keyin mazkur bellashuv hamda qur'a haqida klub matbuot xizmatiga o'z fikrlari bilan o'rtoqlashdi.

"Biz mavsumga tayyorgarlikni davom ettirmoqdamiz. Bu safar "Kaspiy" jamoasiga qarshi o'yin jismoniy tiklanish ishlariga boy bo'lgan tayyorgarlikning birinchi bosqichini yakunlab berdi. Ushbu uchrashuv futbolchilarning funktsional holatini yaxshilash, o'yin shakli va o'yin sur'atini oshirishga qaratildi.

Tayyorgarlikning ushbu bosqichida deyarli barcha futbolchilarga bir xil o'yin vaqti berildi. Charchoq sharoitida har bir futbolchining individual sifatlarini ko'rish, ularning o'yin imkoniyatlarini hamda biz taklif qilayotgan o'yin taktik modeliga qo'yilayotgan talablarni qanday qabul qila olishini baholash biz uchun muhim edi.

Qur'aga kelsak, umuman olganda, kim va qachon raqib sifatida to'g'ri kelishi katta ahamiyatga ega emas. Qur'a tashlashning o'zi mavsum yaqinlashayotganining aniq belgisi. Shuning uchun katta qiziqish uyg'otmoqda.

Har bir jamoa 15 ta uyda va 15 ta mehmonda, jami 30 ta o'yin o'tkazadi. Barcha jamoalarning moddiy-texnik bazasi sezilarli darajada o'sdi. Har bir jamoada sifatli futbolchilarni taklif qilish imkoniyati mavjud.

Ishonch bilan ayta olaman, 2026-yilgi mavsum eng qiziqarlisi bo'ladi. Chunki ko'plab jamoalar o'z oldiga yuqori maqsadlarni qo'ygan, oson o'yinlari bo'lmaydi", - deya fikr bildirdi Samvel Vyacheslavovich.

Manba: "Andijon" klubi matbuot xizmati