Perishich ma'lum bir shart bilan "Inter"ga qaytadi

PSV vingeri Ivan Perishich yaqin kunlarda Milanning "Inter" klubiga ko'chib o'tishi mumkin. Xorvatiyalik tajribali futbolchi "neradzurrilar"ning nishoni bo'lib qolmoqda, ammo klubda boshqa nomzodlar ham ko'rib chiqilmoqda.

Jurnalist Fabritsio Romanoning yozishicha, bugun ko'p narsa hal bo'ladi: agar PSV Chempionlar Ligasi pley-off bosqichiga chiqsa, Perishichni o'z tomoniga og'dirish oson bo'lmaydi, agar jamoa turnirni tark etsa, futbolchi shaxsan o'zi ketishini talab qiladi.

Umumiy bosqichning so'nggi turida eyndxovenliklar o'z uyida "Bavariya"ni qabul qiladi. Myunxen grandi uchun bu o'yin ahamiyatiga ega emas, PSV esa g'alaba qozonsa, pley-offning dastlabki bosqichiga yo'l oladi.