"Monako" "Manchester Siti" markaziy himoyachisini nishonga olgan edi, ammo...

"Monako" "Manchester Siti" himoyachisi Natan Ake bilan shartnoma imzolashni rejalashtirgan edi. Bu haqda L’Equipe xabar bermoqda.

Monegasklar shu tariqa himoyachilar bilan bog'liq vaziyatni o'nglamoqchi. Muhammad Salisu avvalroq tizzasining oldingi xochsimon bog'lamini jarohatlagan, uning o'rniga "Lester Siti"dan Vaut Fas ijaraga olingan edi. Liga 1ning 19-turida "Gavr"ga qarshi o'yinda (0:0) Fasning o'zi to'pig'idan jarohat oldi, uning o'rniga Erik Dayer maydonga tushdi, ammo u ham tizza osti payidan jarohat oldi. Taxminlarga ko'ra, Fas va Dayer bir necha hafta davomida jamoasiga yordam bera olmaydi.

Qayd etilishicha, monakoliklar Ake transferi bo'yicha muzokaralar olib borgan, biroq bu muzokaralar tezda to'xtab qolgan.