APLda joriy mavsum faqat bir jamoa o'z maydonida mag'lubiyatga uchramadi

Yakshanba kuni "Manchester Yunayted" "Arsenal"ning Premer-liga doirasidagi uy uchrashuvlaridagi mag'lubiyatsiz seriyasiga yakun yasadi.

"To'pchilar" "Emireyts"da "qizil iblislar"ga 2:3 hisobida yutqazdi - bu Mikel Arteta jamoasining chempionatning joriy mavsumida o'z uyida birinchi mag'lubiyati bo'ldi. Shu tariqa, APLda o'z maydonida biror marta ham yutqazmagan yagona jamoa - "Sanderlend" qoldi. "Qora mushuklar" o'z maydonida oltita o'yinda g'alaba qozondi, yana beshta holatda durang qayd etildi.

23-turdan so'ng "Sanderlend" 33 ochko bilan turnir jadvalida o'ninchi o'rinda bormoqda. Eslatib o'tamiz, jamoa uchun bu uzoq yillar davomida Angliya oliy divizionidagi ilk mavsum hisoblanadi.