APL grandi "Barselona" bilan Xulian Alvares uchun raqobatlashadi

Madridning "Atletiko" klubi hujumchisi Xulian Alvaresga Londonning "Arsenal" klubi qiziqish bildirmoqda.

"Kanonirlar" argentinalik futbolchining transferini o'tgan yozdayoq o'rganib chiqqandi, ammo o'shanda bunga erisha olmagandi. Jurnalist Ekrem Konurning ma'lum qilishicha, 25 yoshli futbolchi "Arsenal" radarlarida qolmoqda. Angliya grandi "matraschilar" forvardi uchun kelasi yozda "Barselona" bilan kurash olib borishi mumkin.

Potentsial xaridorlar uchun asosiy muammo - "Atletiko"ning talabi: madridliklar o'z yulduzini qo'yib yuborishni istamayapti va taxminan 150 mln evro talab qilmoqda. Transfermarkt portalida jahon chempionining narxi - 100 mln evro, amaldagi shartnoma 2030 yilgacha mo'ljallangan.