Chempionlar ligasida Levandovskidan kattaroq yoshda gol urgan La Liga futbolchilari orasida faqat bitta o'yinchi bor

«Barselona» hujumchisi Robert Levandovski Chempionlar ligasi umumiy bosqichi 7-turida «Slaviya»ga qarshi uchrashuvda (4:2) bir gol urib, ikki bor golli uzatma berdi. Shu orqali u La Liga vakili sifatida mazkur nufuzli evrokubok musobaqasida gol urgan ikkinchi eng katta yoshli futbolchiga aylandi.

Opta Sport statistik portali ma'lum qilishicha, gol urilgan paytda polshalik hujumchisining yoshi 37 yoshu 153 kunni tashkil etgan. Ushbu reytingda La Liga vakillari orasida eng katta yoshda gol urgan futbolchi — Serxio Ramos hisoblanadi. U 2023 yil dekabr oyida «Sevilya» safida «Lans»ga qarshi bahsda (1:2) gol urgan bo'lib, o'sha paytda Ramos 37 yoshu 257 kunlik edi.

Robert Levandovski 2022 yildan buyon «Barselona» sharafini himoya qilib kelmoqda. Futbolchining klub bilan tuzgan shartnomasi 2026 yilga qadar amal qiladi. Joriy mavsumda u barcha musobaqalarda 23 ta uchrashuvda ishtirok etib, 11 ta gol va 2 ta golli uzatma muallifi bo'ldi.