Aus Open–2026: O'zbekistonlik tennischilar turnirdaagi ishtirokidan qancha mablag' ishlab oldi?

Tennis bo'yicha O'zbekiston ayollar terma jamoasi a'zolari — Kamilla Rahimova va Polina Kudermetova 2026 yilgi mavsumning ilk “Katta dubulg'a” turniri — Avstraliya ochiq chempionati yakkalik bahslarida ishtirok etdi.

O'zbekistonning birinchi raqamli ayol tennischisi Kamilla Rahimova ilk davrada dunyoning uchinchi raketkasi, amerikalik Koko Goffga qarshi kortga chiqdi. Uchrashuv 2:6, 3:6 hisobida Rahimovaning mag'lubiyati bilan yakunlandi.

Polina Kudermetova esa musobaqani g'alaba bilan boshladi. U birinchi bosqichda ispaniyalik Giomar de Rilesni 6:2, 6:3 hisobida mag'lub etdi. Biroq ikkinchi davrada daniyalik 23 yoshli Klara Tausonga qarshi kechgan bahsda 3:6, 6:3, 5:7 hisobida imkoniyatni boy berdi.

Ma'lumotlarga ko'ra, yakkalik bahslaridagi ishtiroki orqali Kamilla Rahimova 101 ming AQSh dollari, Polina Kudermetova esa 151 ming AQSh dollari miqdorida kafolatlangan mukofot puliga ega bo'ldi. Endi har ikki tennischi musobaqani juftlik yo'nalishida davom ettiradi.

Turnirning amaldagi chempioni amerikalik Medison Kiz hisoblanadi. U 2025 yilgi finalda belaruslik Arina Sabalenkani 6:3, 2:6, 7:5 hisobida mag'lub etib, faoliyatidagi ilk “Katta dubulg'a” sovrinini qo'lga kiritgan.

Avstraliya ochiq chempionati 18 yanvardan 1 fevralga qadar Melburn shahrida o'tkaziladi. Musobaqaning umumiy sovrin jamg'armasi 75 million AQSh dollariga yaqin bo'lib, yakkalik bahslari g'olibi 2 million 770 ming dollar mukofot puli hamda 2000 reyting ochkosini qo'lga kiritadi.