«Legionerlar borasida to'g'ri tanlov qildik deb umid qilaman» – Vadim Abramov qozoq klubi ustidan g'alaba va yangi legionerlar haqida

«Dinamo» - «Qaysar» (3:1) o'rtasidagi uchrashuvdan keyin samarqandliklar bosh murabbiyi Vadim Abramov fikr bildirdi.

«Yaxshi sparring raqib bo'ldi, aynan shunday o'yinlar uchun ham shu erdamiz. Yigitlar ikkinchi bo'limda yaxshi harakat qilib, o'z ishlarini qilishdi. Bu menga yoqdi. Ehtimol, ilk daqiqadayoq gol urganimiz sabab raqibning kuchiga to'g'ri baho bera olmadik. Ikkinchi bo'lim nazoratimiz ostida o'tdi.

Yangi o'yinchilar haqida? Maydonga tushgan har bir futbolchi o'ziga bildirgan ishonchni oqladi, deyish mumkin. O'ylaymanki, legionerlar borasida to'g'ri tanlov qildik. Ularning ayrimlari hali sport formasida emas, ammo harakatidanoq ular o'ynay olishini sezish mumkin», - dedi Vadim Karlenovich Qozog'iston klubi ustidan qo'lga kiritilgan g'alabadan keyin.