Igor Tiago Braziliya bilan JCh-2026'ga bormoqchi

"Brentford" hujumchisi Igor Tiago bolalikdagi orzusi - Braziliya terma jamoasida o'ynashni istayotganini tan oldi.

"Bu nihoyatda hayajonli tuyg'u. JCh-2026ning bir qismi bo'lishni juda xohlayman, men har doim jahon chempionatida o'ynashni orzu qilganman. Avvallari buni faqat televizorda ko'rardim, endi esa o'zim sinab ko'rishga yaqinman. Xudoning har bir inson hayoti uchun rejasi bor. Agar Xudoning irodasi va Karlo Anchelottining irodasi shunday bo'lsa, o'z mamlakatim nomidan vakillik qilish men uchun zavq va sharaf bo'ladi.

Men tayyor ekanimga ishonaman. Hayotda qila oladigan yagona ishim - gol urish. Xudo meni bunga tayyorlab qo'ygan va nasib qilsa, Braziliyaga oltinchi jahon chempionligini olib kelamiz," - deya Tyagoning so'zlarini keltiradi The Guardian.

Joriy mavsumda 24 yoshli braziliyalik futbolchi barcha musobaqalarda 22ta o'yinda maydonga tushib, 17ta gol urgan va 1ta golga hammualliflik qilgan.