“PSJ” 2024/25 yilgi mavsumning eng ko'p daromad qilgan klubi bo'ldi

UEFA 2024/25-yilgi mavsum bo'yicha moliyaviy hisobotini e'lon qildi. Unda Chempionlar Ligasi, Evropa Ligasi va Konferentsiyalar Ligasida ishtirok etgan klublarga to'langan mukofot pullari ochiqlandi.

Chempionlar Ligasi g'olibi “PSJ” o'tgan mavsumda 144,4 million evro daromad bilan eng ko'p pul ishlab topgan klublar reytingida birinchi o'rinni egalladi. Finalda mag'lub bo'lgan “Inter” esa 136,6 million evro ishlab topib, ikkinchi o'rinni band etdi. Umuman olganda, Chempionlar Ligasida ishtirok etgan 36 klub o'rtasida jami 2,47 milliard evro mukofot puli taqsimlandi.

O'tgan mavsumda 7 ta klub kamida 100 million evro mukofot puli oldi. Bu avvalgi mavsumlarga nisbatan bir oz oshganini ko'rsatmoqda. Chunki 32 jamoa qatnashgan eski formatda bu raqam atigi 5 ta klubni tashkil qilgan, umumiy fond esa 2,08 milliard evro bo'lgan. Chorak finalga chiqqan jamoalar orasida “Aston Villa” 100 million evrodan kam daromad olgan yagona klub bo'ldi — 83,7 million evro. Bunga klubning UEFA reytingi pastligi va Chempionlar Ligasiga 41 yillik tanaffusdan so'ng qaytgani sabab bo'lgan.

“Real Madrid” chorak finalda “Arsenal”ga yutqazgani sabab Chempionlar Ligasidan 102 million evrodan kamroq daromad oldi. Bu 2024-yilgi mavsumiga nisbatan 37 million evro kam. Shunga qaramay, madridliklar UEFA Superkubogida “Atalanta”ni mag'lub etgani uchun qo'shimcha 5 million evro ishlab topdi. “Atalanta” esa ushbu o'yindan 4 million evro daromad qilgan.

Chempionlar Ligasida eng kam daromad olgan klub Slovakiya chempioni “Slovan Bratislava” bo'ldi — 22 million evrodan kam. Jamoa liga bosqichidagi 8 ta o'yinning barchasida mag'lub bo'lgan.

Evropa Ligasi va Konferentsiyalar Ligasi

Chempionlar Ligasidan keyingi musobaqalar bilan daromadlar o'rtasidagi farq katta bo'ldi. Evropa Ligasi g'olibi “Tottenhem” atigi 41 million evro ishlab topdi. Finalchi “Manchester Yunayted” esa 36 million evro oldi. Konferentsiyalar Ligasi g'olibi “Chelsi”ga 21,8 million evro to'lab berildi. London klubi yangi mavsumda Chempionlar Ligasida ishtirok etmoqda.