«Nyukasl» o'z etakchisi bilan shartnomani uzaytirmoqchi

"Nyukasl" rahbariyati braziliyalik yarim himoyachi Bruno Gimaraesni tarkibda saqlab qolmoqchi. Bu haqda TEAMtalk xabar berdi.

Manbaga ko'ra, yaqin vaqt ichida "qarg'alar" 28 yoshli braziliyalik futbolchi bilan mehnat shartnomasini uzaytirish bo'yicha muzokaralarni davom ettiradi.

Gimaraes 2022 yilning yanvaridan beri "Nyukasl" sharafini himoya qilmoqda. Joriy mavsumda yarim himoyachi barcha musobaqalarda 31 ta o'yinda maydonga tushib, 8 ta gol urdi va 6 ta golli uzatmani amalga oshirdi.

Gimaraesning "Nyukasl" bilan amaldagi mehnat shartnomasi 2028 yilning yozigacha mo'ljallangan. Transfermarkt portali futbolchining narxini 75 million evroga baholamoqda.