Klopp — Alonsoning «Real»dan ketishi haqida: «Bu klubda hammasi joyida emasligini ko'rsatadi»

Mashhur  germaniyalik mutaxassis Yurgen Klopp «qaymoqranglilar» bosh murabbiyi lavozimidan Xabi Alonsoning iste'foga chiqarilishi fonida «Real» klubidagi vaziyat haqida o'z fikrini bildirdi. Mutaxassis jamoa Ispaniya Superkubogi finalida «Barselona»ga 2:3 hisobida mag'lub bo'lganidan keyingi kuni ishdan olingan edi.

«Agar Leverkuzenda ikki yildan ortiq vaqt davomida o'zining yuksak murabbiylik mahoratini namoyish etgan Xabi Alonso “Real Madrid"ni bor-yo'g'i olti oy ichida tark etishga majbur bo'lsa, bu klubda hammasi joyida emasligini ko'rsatadi», — deya Kloppning so'zlarini Spox nashri keltirdi.

Xabi Alonso «Real»ni 2025 yil yozidan beri boshqarib kelayotgan edi. Ungacha u «Bayer»da faoliyat olib borgan. «Qaymoqranglilar»ning yangi bosh murabbiyi etib madridliklarning yana bir sobiq futbolchisi Alvaro Arbeloa tayinlandi. Shuningdek, avvalroq Klopp madridliklar bosh murabbiyi lavozimiga nomzodlardan biri sifatida tilga olingan edi.