«G'azalkent» klubi Liga a'zosi bo'lish uchun ariza topshirdi

Toshkent viloyatining Bo'stonliq tumaniga katta futbolni olib kirishni maqsad qilgan «G'azalkent» futbol klubi Liga a'zosi bo'lish uchun ariza topshirdi.

Mazkur klubning tashkil etilishi, uning maqsadi, infratuzilma bunyod qilish uchun yo'naltirayotgan investitsiyasi hamda bolalar futboliga e'tibor berish orqali, ularning professional futbolga qadar bo'lgan yo'lni bosib o'tish bo'yicha rejasi 2025 yilgi mavsum davomida Liga bilan kelishib kelinmoqda.

Ayni vaqtda G'azalkent shahrida joylashgan stadion hujjatlarini rasmiylashtirish bilan bog'liq ishlar davom etmoqda. Liga va Assotsiatsiya kelishuviga ko'ra, klub tez orada O'FA qoshidagi futbol maktablaridan biri bilan shartnoma imzolashi ko'zda tutilgan. Bu orqali klub minimum sakkiz yosh toifasidagi guruhlarni rivojlantirish, Toshkent viloyatining turli hududlarida filiallarni tashkil etish orqali, tarbiyalanuvchilarni Liga talab etgan ko'rinishda ro'yxatdan o'tkazish ishlarini amalga oshiradi.

Stadion bilan bog'liq hujjatlar to'liq rasmiylashtirib bo'lingach, «G'azalkent» klubi shahardagi stadionni Liga talab etgan ko'rinishga keltirish ishlarini boshlaydi. Infratuzilmani rivojlantirish yo'lida klub 12 milliard so'm investitsiya kiritishni rejalashtirgan. Barchasi reja bo'yicha davom etsa, mavsumning ikkinchi yarmiga qadar stadion katta uchrashuvlarni qabul qilish uchun tayyor bo'ladi.

Shuningdek, klubning yillik xarajatlar smetasi Liga talab qilgan ko'rinishda tasdiqlangan bo'lib, u o'z ichiga bir qator muhim jihatlarni qamrab olgan. Klub mavsumga tayyorgarlik doirasida xorijiy yig'inda ishtirok etadi, shuningdek, yosh futbolchilar bilan individual ishlash tizimi xorijiy mutaxassislar tomonidan yo'lga qo'yiladi.

Yuqoridagilardan kelib chiqib, Liga «G'azalkent» klubini o'z a'zoligiga qabul qilish masalasini Ijroiya qo'mita kun tartibiga kiritdi. Endilikda stadion va futbol maktabi bilan bog'liq masalalar o'zaro hamkorlikda amalga oshiriladi.

Manba: pfl.uz