Luis Enrike "PSJ"ning Frantsiya kubogini tark etganiga munosabat bildirdi

"PSJ" sensatsion tarzda 1/16 finaldayoq Frantsiya kubogini tark etdi. Luis Enrike jamoasi o'z maydonida "Parij"ga minimal hisobda yutqazdi - 0:1. O'yindan keyin "PSJ" ustozi ushbu mag'lubiyatga izoh berdi. Ispaniyalik mutaxassisning fikricha, natija adolatsiz bo'lgan.

"O'ylaymanki, bu o'yinni ta'riflash oson. Qiyin bo'ldi, lekin juda yaxshi o'ynadik. Biz o'z ishimizni bajardik - to'pni nazorat qildik, ustunlik qildik. Futbolda gol urish kerak: ular bitta gol urishdi, biz esa yo'q.

Jamoaviy o'yindan ham, individual harakatlardan ham mamnunman. Natija adolatsiz, lekin uni qabul qilish kerak. "Parij"ga eng yaxshi tilaklarni tilayman, ammo maydonda ko'rganlarimdan mamnunman," - deya Enrikening so'zlarini keltiradi Le Parisien.