"Man Siti" 35-40 mln evrolik APL futbolchisi uchun "Bavariya" bilan kurashishi mumkin

"Manchester Siti" "Brentford"ning o'ng qanot himoyachisi Mikael Kayodeni kuzatib bormoqda. "Shaharliklar" rahbariyati 21 yoshli futbolchining himoyadagi sovuqqonligi va hujumga qo'shila olish mahoratiga qoyil qolishdi. Bu haqda Caught Offside xabar bermoqda.

Manbaga ko'ra, italiyalik futbolchini ingliz klubidan tashqari "Bavariya", "Yuventus" va "Inter" ham kuzatib bormoqda. Agar qishki transferlar vaqtida rasmiy taklif tushsa, "Brentford" Kayodening transferi uchun 35-40 mln evro talab qiladi. Ta'kidlanishicha, kelasi yozda himoyachining narxi oshishi mumkin.

Joriy mavsumda Kayode barcha musobaqalarda 25 ta o'yinda maydonga tushdi. Futbolchining klub bilan mehnat shartnomasi 2030 yil yozigacha mo'ljallangan. Transfermarkt portalida keltirilgan ma'lumotlarga ko'ra, futbolchining bozor narxi 20 mln evroni tashkil etadi.