Po'latxo'ja Xoldorxonov: “Xudo xohlasa, «Andijon»ga ham chempionlikni niyat qilib keldim”
/ Kiritdi: BestMaster Ko'rilgan: 534
Yangi mavsum uchun jiddiy vazifalar sari kurashishni ko'zlagan «Andijon» shu niyatda tarkibini kuchaytirib bormoqda.
Aynan ushbu maqsadda taklif qilingan futbolchilardan biri Po'latxo'ja Xoldorxonov bo'lib, 22 yoshli hujumchi kuni kecha jamoamiz bilan shartnoma imzoladi va iqtidorli hujumchi klub matbuot xizmati savollariga javob qaytardi.
— Po'latxo'ja, sizni «Andijon» a'zosiga aylanganingiz bilan muborakbod etaman. Shartnoma imzolandi va endi bu borada nimalarni ayta olasiz?
— «Andijon» jamoasini va jonkuyar muxlislarini hurmat qilaman va men bu jamoa a'zosi bo'lganimdan xursandman.
— Ushbu variantdan ko'nglingiz to'ldimi?
— Men har qanday chaqiruvga tayyor edim. Lekin variantlar orasida «Andijon» klubi menga ko'proq yoqdi. Sababi — ashaddiy muxlislar va tajribali murabbiy.
— «Sho'rtan» safida to'purarlik mahoratingizni ko'rsata oldingiz. Yangi mavsumda yanada o'zgacha ishtiyoq sizda sezilyapti. Bu haqida nima deya olasiz?
— «Sho'rtan» jamoasiga tez moslashib ketdim va men u erda o'zimni optimal formamga chiqa olmadim. Endi-endi optimal formamga chiqayotgan paytimda chempionat tugab qoldi. «Andijon» katta jamoa va bu erda mas'uliyat ham ko'proq, ayniqsa, ishqibozlar oldida. Xudo xohlasa, tez moslashib ketaman, deb o'ylayman. Sababi bizda hali ikki oy vaqt bor va barcha bilan bir-birimizni tezroq tushunib ketamiz, deb umid qilaman.
— Oxirgi marta «Paxtakor» bilan chempionlikka erishgandingiz. Yana medallarni sog'indingizmi?
— Albatta, men yoshligimda ko'plab musobaqalarda chempionlikni qo'lga kiritganman va yosh bo'lishimga qaramasdan Osiyo chempioni, O'zbekiston chempioni bo'lish nasib qilgan. Xudo xohlasa, «Andijon»ga ham chempionlikni niyat qilib keldim.
— «Andijon»dagi o'zgarishlarni ko'rib turibsiz va bu boradagi munosabatingiz bizga qiziq…
— Bu juda ham quvonarli va menga faqat motivatsiya beryapti. Ayniqsa, 2026-yilni Andijon viloyati hokimi aytganidek, Andijonda futbol yili qilamiz, deganlari ajoyib. Muxlislar ham yildan-yilga kuchayib borayotganligi meni quvontiradi.
— Ushbu taklifni tanlashingizda sizga asosiy turtki bo'lgan jihat nimadan iborat bo'ldi?
— Ushbu taklifni qabul qilishimga asosiy turtkilardan biri bu tajribali murabbiy va chempionlikka bo'lgan intilish. Shuningdek, albatta, «Ultras Burgut». Men «Bobur arena»da ularning qo'llab-quvvatlashlarini sabrsizlik bilan kutib qolaman va o'ylaymanki, muxlislarni va jamoani o'zimning gollarim bilan xursand qilaman. Olg'a «Andijon», olg'a «Ultras Burgut».
Bosh sahifaga
386