Superliganing 7 klubi yoshlar bilan ishlash bo'yicha talabni bajarishda etakchilik qilmoqda

Avvalroq professional futbol klublari o'z tarbiyalanuvchilarini Liga ro'yxatidan o'tkazishi shartligi ma'lum qilingandi. Assotsiatsiya va Liga o'zaro kelishgan holda klub va uning maktabi masalasini to'la tartibga soladi.

Klub professional mehnat shartnomalarini Liga ro'yxatidan o'tkazishi uchun sakkiz yosh toifasining har birida eng kamida 25 nafardan tarbiyalanuvchiga ega bo'lishi lozim. Bolalar futbolini rivojlantirish loyihasi asosida Superliga klublari MyLeague platformasiga o'n yosh toifasi bo'yicha (2007—2016) tarbiyalanuvchilarini kiritishni boshladi. Endilikda Liga tomonidan tasdiqlangan har bir tarbiyalanuvchi profilida elektron futbolchi pasporti va unda futbolchining FIFA ID raqami aks etmoqda.

Hozirga qadar «Neftchi» (183), «Qo'qon-1912» (175 nafar), «OKMK» (275), «Paxtakor» (254), «Bunyodkor» (241), «Nasaf» (196) va «Qizilqum» (161) klublari mazkur talabni bajarishda etakchilik qilmoqda. Qavs ichida Liga tomonidan tasdiqlangan tarbiyalanuvchilar ro'yxati ko'rsatib o'tilgan. Ular yosh futbolchilarni FIFA talab qilgan ko'rinishda ro'yxatdan o'tkazishda davom etmoqda. Shundan kelib chiqib, yuqoridagi raqamlar oshishda davom etadi.

Endilikda mazkur klublar 2026-yilgi mavsum uchun professional futbolchilarni ro'yxatdan o'tkazishi mumkin. Qolgan klublar esa buning uchun faollashishi talab etiladi.

Aynan qaysi yosh futbolchi Liga ro'yxatidan o'tkazilganligini e-pfl.uz havolasi orqali tekshirib olish imkoniyati mavjud. Buning uchun havaskor futbolchilar bo'limiga kirish va futbolchining ism-sharifi yoki aniq tug'ilgan sanasi orqali izlash kifoya.