Sulsher muvaffaqiyatga erishsa, "Manchester Yunayted"ning doimiy murabbiyi bo'lib qolishga umid qilmoqda

Ule Gunnar Sulsher "Manchester Yunayted"ga qaytishga tayyorlanmoqda. Turli nufuzli manbalarning ma'lum qilishicha, norvegiyalik mutaxassis yaqinda klub bilan o'tkazilgan muzokaralardan so'ng "qizil iblislar" bosh murabbiyi vazifasini bajaruvchi etib tayinlanishga yaqin turibdi. Jurnalist Jeymi Jeksonning ma'lum qilishicha, 52 yoshli mutaxassisning ambitsiyalari "vaqtinchalik murabbiy" roli bilan cheklanmaydi: u joriy mavsumda o'zini ko'rsatib, jamoa bilan muvaffaqiyatga erishsa, "MYu"ning doimiy murabbiyi bo'lishga umid qilmoqda.

Eslatib o'tamiz, Sulsher ilgari bu ishni uddalagan: 2018 yil oxirida u murabbiy vazifasini bajaruvchi bo'lgan, 2019 yil mart oyida esa doimiy murabbiy maqomiga tasdiqlangan va 2021 yil noyabrida ishdan bo'shatilgan.