«Andijon»: Abbos Abdug'afforov bilan shartnoma uzaytirildi, ikki nafar Osiyo chempionlari jamoaga qo'shildi
/ Kiritdi: BestMaster Ko'rilgan: 643
«Andijon» futbol klubi yangi mavsum oldidan tarkibni saqlab qolish va kuchaytirish borasida faol ish olib bormoqda. Jamoa rahbariyati yosh va istiqbolli futbolchilarga alohida e'tibor qaratmoqda.
Jamoaning iste'dodli yarim himoyachilaridan biri Abbos Abdug'afforov bilan mehnat shartnomasi uzaytirildi. 2004 yil 30 dekabr kuni tavallud topgan futbolchi shu paytga qadar asosan «Andijon» U-21 jamoasi safida to'p surib kelgan. O'tgan mavsum u Superliga hamda OChL-2 musobaqalarida debyutini o'tkazishga muvaffaq bo'ldi. Klub mutaxassislari Abbosni jamoada yorqin kelajak kutayotganiga ishonch bildirmoqda.
Shuningdek, «Andijon» navbatdagi transferini amalga oshirib, yoshlar o'rtasida Osiyo chempioni bo'lgan darvozabon Ne'matulloh Rustamjonovni o'z safiga qo'shib oldi. 2008 yil 17 mart kuni Toshkent shahrida tug'ilgan futbolchi faoliyatini «Paxtakor»da boshlagan, keyinchalik «Odil Junior» akademiyasida tahsil olgan.
U 2024 yilgi Osiyo chempionati saralash bosqichida 3 ta o'yindan 2 tasida maydonga tushib, darvozasini daxlsiz saqlagan. Shuningdek, o'tgan yili U-17 Osiyo chempionatida O'zbekiston terma jamoasi bilan qit'a chempioni bo'ldi va turnirning eng yaxshi darvozaboni deb topildi. Ushbu musobaqada 5 ta o'yinda ishtirok etib, 2 ta «quruq» o'yin o'tkazgan. Qatarda bo'lib o'tgan jahon chempionatida ham qatnashgan.
Bundan tashqari, «Burgutlar» safini yana bir Osiyo chempioni va turnir to'purari — Asilbek Aliev to'ldirdi. 2009 yil 1 yanvar kuni Farg'ona viloyati Buvayda tumanida tavallud topgan futbolchi 2019 yildan «Odil Junior» akademiyasida tahsil olgan.
O'tgan mavsum u birinchi ligada «Olimpiya» klubi sharafini himoya qilib, 6 ta gol urib, 4 ta golli uzatmani amalga oshirgan. Asilbek Aliev O'zbekiston U-17 terma jamoasi bilan 2025 yil Saudiya Arabistonida bo'lib o'tgan Osiyo Kubogida g'olib chiqqan va 6 ta o'yinda 5 ta gol urib, musobaqaning eng yaxshi to'purariga aylangan. Shuningdek, u o'tgan yili U-17 jahon chempionatida (Qatar) ham ishtirok etib, bir gol muallifi bo'lgan.
Bosh sahifaga
430