BAAning «No Limits Sports» fondi O'zbekistondan klub sotib olishi mumkin

Birlashgan Arab Amirligining No Limits Sports investitsiya fondi Evroosiyo mintaqasidan futbol klublarini xarid qilish imkoniyatini o'rganib chiqmoqda. TASS axborot agentligi xabariga ko'ra, fond mazkur jarayonda O'zbekistonga ham alohida e'tibor qaratmoqda.

Fondning Evrosiyo yo'nalishi prezidenti Vadim Andreevning ma'lum qilishicha, hozirda Rossiya, O'zbekiston, Belarus, Gruziya va Qozog'istondagi klublar tahlil qilinmoqda:

“Shuni alohida qayd etish joizki, hozirda O'zbekiston, Belarus, Gruziya va Qozog'istondagi loyihalarni ham ko'rib chiqyapmiz. Yaqin vaqt ichida 10–12 ta klubni tahlil qilib, fond investorlariga taqdim etish uchun batafsil hisobot tayyorlashni rejalashtirganmiz. Bu orqali aktivlar o'sishi va investitsiya qaytimi nuqtayi nazaridan eng istiqbolli ob'ektlarni aniqlaymiz”, dedi Andreev.

Andreevning ta'kidlashicha, fond uchun klubning tarixi, infratuzilmasi, yoshlar akademiyasi hamda hududiy futbol maktablari bilan ishlash salohiyati muhim ahamiyatga ega. Shuningdek, No Limits Sports davlat va xususiy sektor hamkorligiga asoslangan modelni ustuvor deb hisoblaydi. Bu yondashuv hududiy resurslardan samarali foydalanish, xarajatlarni optimallashtirish va klubni tezroq rivojlantirish imkonini beradi.

Qayd etilishicha, fond Rossiyaning Volgograd shahridagi “Rotor” klubiga ham qiziqish bildirgan. Biroq boshqa mamlakatlardagi qaysi klublar ro'yxatda bor ekanligi oshkor qilinmagan. Fond rahbariyatiga ko'ra, aniq qarorlar tahlil jarayoni yakunlangach qabul qilinadi. Agar muzokaralar muvaffaqiyatli kechsa, ayrim klublar bilan 6–12 oy ichida kelishuvlar imzolanishi mumkin.