Endrikning "Real"dan "Lion"ga ijarasi bo'yicha moliyaviy tafsilotlar ma'lum qilindi

"Lion" mavsum oxirigacha "Real" hujumchisi Endrikni ijaraga oldi.

The Athletic jurnalisti Mario Kortegananing ma'lum qilishicha, frantsuz klubi braziliyalik futbolchining ijarasi uchun bir million evro to'laydi. Biroq, hujumchi asosiy tarkibda maydonga tushgan har beshta o'yin uchun "Lion" 200 ming evro kamroq to'laydi. Shu tariqa, Endrik "Lion" safida 25 o'yinda asosiy tarkibda maydonga tushsa, frantsuzlar braziliyalik futbolchining ijarasi uchun "Real"ga hech narsa to'lamaydi.

Endrik "Real"ga 2024 yilning yozida "Palmeyras"dan 47 million evro evaziga o'tgandi. Uning "qaymoqranglilar" bilan shartnomasi 2030 yilning 30 iyuniga qadar imzolangan. Joriy mavsumda braziliyalik hujumchi Madrid klubi safida atigi uchta o'yinda maydonga tushdi va ularda gol ura olmadi.